សមិទ្ធផលរបស់ ស.ស.យ.ក. ជាទំនុកចិត្តដល់ថ្នាក់ដឹកនាំ និងប្រជាពលរដ្ឋ ដែលបង្ហាញពីសក្តានុពល និងសមត្ថភាពនៃការដឹកនាំប្រទេសនៅថ្ងៃអនាគត
ក្នុងឱកាសពិធីបើកមហាសន្និបាតតំណាងទូទាំងប្រទេស លើកទី៤ សហភាពសហព័ន្ធយុវជនកម្ពុជា នាព្រឹកថ្ងៃទី២៦ ខែវិច្ឆិកា ឆ្នាំ២០១៨នេះ សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា បានបង្ហាញភាពជឿជាក់មកលើយុវជន ស.ស.យ.ក. ជាធនធានមនុស្សដ៏មានសក្តានុពលក្នុងការបន្តដឹកនាំប្រទេសជាតិទៅអនាគត។ សម្តេចបានមានប្រសាសន៍ថា “ខ្ញុំមានជំនឿជាក់ថា ស.ស.យ.ក នឹងសម្រេចបាននូវសមិទ្ធិផលធំៗ និងថ្មីៗផ្សេងទៀត ក្នុងការអនុវត្តស្មារតី និងទិសដៅដែលមហាសន្និបាតលើកទី ៤ បានកំណត់។ ខ្ញុំបានសង្កេតឃើញថា ស.ស.យ.ក. បានដើរតួនាទីយ៉ាងសំខាន់ ក្នុងចលនាមហាជន ដើម្បីចូលរួមក្នុងសកម្មភាពសង្គម សេដ្ឋកិច្ច នយោបាយ ចូលរួមអភិវឌ្ឍគោលនយោបាយនានារបស់រាជរដ្ឋាភិបាលកម្ពុជា នៅតាមវិស័យ និងគ្រប់មូលដ្ឋាននៅទូទាំងប្រទេស ព្រមទាំងបានចូលរួមចំណែកក្នុងការលើកស្ទួយមោទនៈភាពជាតិ និងកិត្យានុភាពជាតិនៅលើឆាកអន្តរជាតិ។”
