សេចក្តីប្រកាសព័ត៌មាន
ស្តីពី
«វត្តមានប្រទីបនៃសហភាពសហព័ន្ធយុវជនកម្ពុជា
ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក »
សហភាពសហព័ន្ធយុវជនកម្ពុជា សូមជម្រាបជូនដំណឹងដល់អ្នកសារព័ត៌មានជាតិ អន្តរជាតិ និងសាធារណជនអោយបានជ្រាបថា នៅក្នុងឆ្នាំ២០១៨នេះ សហភាពសហព័ន្ធយុវជនកម្ពុជា មានកិត្តិយសដ៏ខ្ពង់ខ្ពស់ចូលរួមជាវត្តមានលើកទី១ នូវប្រទីបនៃសហភាពសហព័ន្ធយុវជនកម្ពុជា ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលនឹងប្រារព្ធឡើងចាប់ពីថ្ងៃ ១៤កើត ដល់ ១រោច ខែកត្តិក ឆ្នាំច សំរឹទ្ធស័ក ព.ស. ២៥៦២ ត្រូវនឹងថ្ងៃទី២១ ដល់ ថ្ងៃទី២៣ ខែវិច្ឆិកា ឆ្នាំ២០១៨។
ប្រទីបនៃសហភាពសហព័ន្ធយុវជនកម្ពុជា រំលេចជារូបភាព “នាវាកម្ពុជា” ដែលជានាគរាជដ៏អង់អាច និងប្រកបដោយការតុបតែងលំអយ៉ាងរស់រវើក ជានិមិត្តរូបនៃភាពត្រជាក់ត្រជុំ ជាស្ពានចម្លងពីឋានមនុស្ស និងឋានទេវតា និងជានិមិត្តរូបនៃការការពារនិងថែរក្សាសម្បតិ្តប្រកបដោយមហិទ្ធិឫទ្ធិ ហើយនៅលើ “នាវាកម្ពុជា” មានទង់នៃព្រះរាជាណាចក្រកម្ពុជាដ៏ធំមួយ និងអណ្តែតលើភ្លើងពណ៌ខៀវតំណាងដល់ មហាសមុទ្រ។
នៅខាងលើ “នាវាកម្ពុជា” មានរំលេចរូបរចនាតំណាងដល់ប្រាង្គប្រាសាទអង្គរវត្ត ព្រះបរមរាជវាំង វិមានឯករាជ្យ វិមានរដ្ឋសភា វិមានសន្តិភាព វិមានឈ្នះ-ឈ្នះ និងវិមានអនុស្សាវរីយ៍រណសិរ្ស២ធ្នូ ដែលជាតំណាងដល់ភាពជោគជ័យ រុងរឿង និងអភិវឌ្ឍន៍លើខឿនវប្បធម៌ អរិយធម៌ និងប្រវត្តិសាស្រ្ត ដ៏រឹងមាំនៃព្រះរាជាណាចក្រកម្ពុជា។ ក្នុងន័យនេះ សហភាពសហព័ន្ធយុវជនកម្ពុជាលើកតម្កើងស្មារតីស្ម័គ្រចិត្ត ភាពជាគម្រូ និងការបន្តវេននៃយុវជនកម្ពុជា គឺ “យុវជនក្នុងបុព្វហេតុមាតុភូមិ” ក្នុងការថែរក្សាសមិទ្ធិផលដែលបានកសាងកន្លងមកប្រកបមោទនភាព និងបន្តអភិវឌ្ឍជាតិកម្ពុជាមួយ ដែលជាអនាគតរួមគ្នា និងជោគវាសនារួមគ្នា។
ទង់ជាតិនៃព្រះរាជាណាចក្រកម្ពុជាដ៏ធំ លាតសន្ធឹងនៅលើ “នាវាកម្ពុជា” ជាតំណាងដល់មហាសាមគ្គីនៃយុវជន និងប្រជាជាតិកម្ពុជាក្នុងការរួមគ្នាជួយដល់ប្រទេសជាតិអោយមានការរីកចម្រើនទៅមុខ ជាមួយនឹងការដាក់ឧត្តមប្រយោជន៍ជាតិជាធំ។ រំលេចជាមួយពាក្យ “យើងជឿជាក់លើព្រះរាជាណាចក្រកម្ពុជា” ជាកត្តាបញ្ជាក់ថាយុវជនជាសមាជិក សមាជិកា នៃ សហភាពសហព័ន្ធយុវជនកម្ពុជា ប្តេជ្ញាចូលរួមជម្រុញ “នាវាកម្ពុជា” អោយឆ្ពោះទៅមុខដោយស្មារតី នៃការជឿជាក់លើព្រះរាជាណាចក្រកម្ពុជា។
ឆ្នាំ១៩៥៣ – ២០១៨ ជាតំណាងដល់ការអបអរសាទរនៃទិវាបុណ្យឯករាជ្យជាតិនៃព្រះរាជាណាចក្រកម្ពុជាគំរប់ខួបលើកទី៦៥ឆ្នាំ។
គួររំលឹកផងដែរថា សហភាពសហព័ន្ធយុវជនកម្ពុជា ជារណសិរ្សទូលំទូលាយនៃយុវជនកម្ពុជា ដែលបានបន្តបេសកកម្មពីសមាគមយុវជនសាមគ្គីសង្គ្រោះជាតិកម្ពុជា និងសមាគមយុវជនកម្ពុជា ដែលបានបដិសន្ធិនៅថ្ងៃទី០២ ខែធ្នូ ឆ្នាំ១៩៧៨ ក្នុងគោលដៅសំខាន់បំផុតដើម្បីប្រមូលផ្តុំយុវជនគ្រប់ទិសទី ជាមហាកម្លាំងសាមគ្គី ក្នុងការរួមចំណែកកសាងប្រទេសកម្ពុជាមួយឯករាជ្យ សន្តិភាព សេរីភាព ប្រជាធិបតេយ្យ និងវឌ្ឍនភាពសង្គម។
សម្រាប់ព័ត៌មានបន្ថែមសូមទាក់ទងមកកាន់លេខទូរស័ព្ទ៖ ០៩៦ ៩៩៩ ៣៩៣៣ ឬ ០៨៦ ៣០០ ៣៧៧។
