សុន្ទរកថា

ឯកឧត្តម ហ៊ុន ម៉ានី ប្រធានសហ​ភាពសហព័ន្ធយុវជនកម្ពុជា
ក្នុងពិធីអបអរសាទរខួបលើកទី៤១
នៃកំណើតសហភាពសហព័ន្ធយុវជនកម្ពុជា
២ ធ្នូ ១៩៧៨ – ២ ធ្នូ ២០១៩

ជាបឋមសូមគោរព

• ឯកឧត្តម លោកជំទាវ ថ្នាក់ដឹកនាំ រដ្ឋសភា រាជរដ្ឋាភិបាល ក្រុមប្រឹក្សា គណៈអភិបាលជាទីគោរព
• ឯកឧត្តម លោកជំទាវ  ឯកអគ្គរាជទូត ឯកអគ្គរដ្ឋទូត និងតំណាងអង្គទូតដែលមានវត្តមាននៅទីនេះ
• ឯកឧត្តម លោកជំទាវ លោក លោកស្រីភ្ញៀវកិត្តិយសជាតិ-អន្តរជាតិ
• សមាជិក សមាជិកា ក្រុមគ្រួសារសហភាពសហព័ន្ធយុវជនកម្ពុជាទូទាំងប្រទេសជាទីមេត្រី

ក្នុងឱកាសដ៏មហោឡារិកនៃខួបលើកទី៤១ នៃកំណើតសហភាពសហព័ន្ធយុវជនកម្ពុជា សមាជិក សមាជិកា ក្រុមគ្រួសារសហភាពសហព័ន្ធយុវជនកម្ពុជាទូទាំងប្រទេស បានមកជួបជុំគ្នានៅថ្ងៃនេះ ក្នុងគោលបំណង៖

• ទី១-រំលឹកឡើងវិញនូវគុណូបការៈ ការលះបង់របស់យុវជនជំនាន់មុន និងបុព្វបុរសខ្មែរគ្រប់ជំនាន់
• ទី២-អបអរសាទរនូវសមិទ្ធផលនានាដែលយើងសម្រេចបានមកដល់ពេលនេះ
• និងទី៣-និងត្រៀមខ្លួនក្នុងការចូលរួមចំណែកដើម្បីនាំយកកម្ពុជាទៅអនាគតឲ្យកាន់តែល្អប្រ​សើ​រ

ថ្ងៃនេះ ខ្ញុំពិតជាមានសេចក្តីសោមនស្សរីករាយក្រៃលែង ដែលយើងទាំងអស់គ្នាបានមកជួបជុំគ្នា ជាមួយនឹងឯកសណ្ឋានខុសៗគ្នា តែក្នុងនាមជាយុវជនខ្មែរតែមួយ ដើម្បីរំលឹកឡើងវិ​ញនូវគុណូបការៈ និងការលះបង់ដ៏ឧត្តុងឧត្តមរបស់បុព្វបុរសរបស់យើងដែលជាយុវជនជំ​នាន់​មុ​ន។

ថ្ងៃនេះក៏ជាឱកាសដ៏មហោឡារិករបស់យើងទាំងអស់គ្នា ក្នុងការបង្ហាញឲ្យឃើញថាកម្ពុជា បានធ្វើដំណើរឆ្ងាយប៉ុណ្ណាហើយរហូតដល់ពេលនេះ។

កាលពី ៦៦ឆ្នាំមុន កម្ពុជាទាមទារបានមកវិញនូវឯករាជ្យពេញលេញ ដែលជាការទទួលបាននូវសិទ្ធិស្វ័យសម្រេច និងភាពជាម្ចាស់លើជោគវាសនាប្រទេសជាតិខ្លួន។ ក្នុងន័យ​នេះ ក្នុងនាមជាយុវជនជំនាន់ក្រោយ យើងមកជួបជុំគ្នានៅទីនេះ ថ្ងៃនេះ ដើម្បីរំលឹក ក៏ដូចជាបង្ហាញនូវការចងចាំជានិច្ចនូវព្រះរាជបូជនីយកិច្ច ប្រកបដោយវីរភាព ពលិកម្មដ៏ក្លៀវក្លា និងព្រះបញ្ញាញាណដ៏ឈ្លាសវៃរបស់ ព្រះករុណា ព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋ និងបុព្វបុរសខ្មែរគ្រប់រូបនាពេលនោះ។

ក្រុមគ្រួសារ ស.ស.យ.ក. ភ្ញៀវកិត្តិយសជាតិ អន្តរជាតិ និងអង្គពិធីទាំងមូលជាទីមេត្រី!

៤១ឆ្នាំមុន សហភាពសហព័ន្ធយុវជនកម្ពុជាបានចាប់បដិសន្ធិឡើង។ ឆ្លៀតក្នុងឱកា​ស​នៃការអបអរសាទរខួបកំណើតរបស់យើងនាថ្ងៃនេះ ខ្ញុំសូមរំលឹកឡើងវិញអំពីមូលហេតុ បរិបទ និងកាលៈទេសៈ ដែលជាហេតុនាំឲ្យមានការបង្កើតសហភាពសហព័ន្ធយុវជនកម្ពុជា។ អ្វីទាំងនោះផ្តើមចេញពីរដ្ឋប្រហារទម្លាក់សម្តេចព្រះនរោត្តម សីហនុ នាថ្ងៃទី១៨ ខែមីនា ឆ្នាំ១៩៧០  ដែលជំរុញឲ្យមានការកើនឡើងនូវឥទ្ធិពល រហូតដល់ការកាន់អំណាចរបស់ខ្មែរក្រហម នៅថ្ងៃទី១៧ ខែមេសា ឆ្នាំ១៩៧៥។ ស.ស.យ.ក. ដែលជាផ្នែកមួយនៃរណសិរ្សសាមគ្គីសង្គ្រោះជាតិកម្ពុជាបានកកើតឡើង ក្នុងបរិបទដែលរបបប្រល័យពូជសាសន៍ដ៏សាហាវយង់ឃ្នងនោះ បានកាប់សម្លាប់ប្រជាជនខ្មែរស្លូតត្រង់អស់ប្រមាណជិត៣លាននាក់ ក្នុងរយៈពេលត្រឹមតែ ៣ឆ្នាំ ៨ខែ និង២០ថ្ងៃ។

ខណៈពេល ដែលពិភពលោកមិនបានខ្វាយខ្វល់ទាល់តែសោះអំពីឧក្រិដ្ឋកម្មប្រឆាំងមនុស្សជាតិ និងទុក្ខសោកដែលប្រជាជនកម្ពុជារងគ្រោះនាពេលនោះ កម្ពុជាមិនមានជម្រើសណាផ្សេងក្រៅពីក្រោកឈរឡើងដោយខ្លួនឯង ហ៊ានលះបង់ ដោយយកជីវិតធ្វើជាដើមទុនដើម្បីរំ​ដោះ សង្គ្រោះប្រជាជន និងកសាងជាតិឲ្យរស់ឡើងវិញ។ នេះជាហេតុផលដែលយើងត្រូវ ចងចាំថាអ្វីៗត្រូវចាប់ផ្តើមពីយើងខ្លួនឯងមិនថាកាលៈទេសៈណានោះទេ។ នៅថ្ងៃទី២ ខែធ្នូ ឆ្នាំ១៩៧៨ រណសិរ្សសាមគ្គីសង្គ្រោះ​ជាតិកម្ពុជាត្រូវបានបង្កើតឡើងក្រោមការដឹកនាំរបស់ សម្តេច ជា ស៊ីម សម្តេច ហេង សំរិន និងសម្តេច ហ៊ុន សែន នៅស្រុកស្នួល ខេត្តក្រចេះ។ ជាមួយជំនួយពីកងទ័ពស្ម័គ្រចិត្តវៀតណាម ថ្នាក់ដឹកនាំនៃរណសិរ្សសាមគ្គីសង្គ្រោះជាតិកម្ពុជា បានផ្តួលរំលំរបបខ្មែរក្រហម និងរំដោះកម្ពុជា នៅថ្ងៃទី៧ ខែមករា ឆ្នាំ១៩៧៩​ ជាថ្ងៃដែលបានផ្តល់កំណើតទី២ ដល់ប្រជាជនកម្ពុជាគ្រប់ស្រទាប់វណ្ណៈ។

ទោះ ៤១ ឆ្នាំបានកន្លងផុតទៅ ស្មារតី ២ ធ្នូ នៅតែដក់ជាប់ជាមួយយើងខ្ញុំទាំងអស់គ្នា។ ថ្ងៃនេះ យើងទាំងអស់គ្នាប្តេជ្ញាបន្ត និងមិនឲ្យស្មារតី ២ ធ្នូ បាត់បង់បានឡើយ។

តើអ្វីជាស្មារតី ២ ធ្នូ?

សម្រាប់ខ្ញុំ ស្មារតី ២ ធ្នូ សំដៅដល់ “ការលះបង់ និងការដាក់ប្រយោជន៍បុគ្គលម្នាក់ៗដោយឡែក ហើយមករួបរួមគ្នា ពុះពារដើម្បីសម្រេចនូវបុព្វហេតុរួម នោះគឺសម្រាប់សង្គមជាតិ និងប្រជាជន”។

ក្នុងន័យនេះ យើងអាចសង្កេតបានថា ទោះបីយើងមានលទ្ធភាព ការងារ និងទំនួល ខុសត្រូវខុសៗគ្នា មាន ភេទ អាយុ ជំនឿសាសនាខុសៗគ្នា មិនថាយើងជាសិស្ស និស្សិត ជា គ្រូបង្រៀន ជាវេជ្ជបណ្ឌិត ជាកសិករ ជាកម្មករ ជាកីឡាករ ជាសិល្បករ ឬយើងជាធនធានក្នុងវិ​ស័យឯកជន ឬមន្ត្រីរាជការសាធារណៈក៏ដោយ យើង​សុទ្ធតែអាច និងបានដាក់ផលប្រយោជន៍ផ្ទាល់ខ្លួនរបស់យើងទៅម្ខាង ហើយមករួមគ្នាក្នុងឯកសណ្ឋាន ស.ស.យ.ក. តែមួយ ប្តេជ្ញា និងខិតខំប្រឹងប្រែងបំពេញភារកិច្ចដែលមាននៅចំពោះមុខ​ដើម្បីភាពរីកចម្រើននៃសង្គមជាតិយើង​។

បច្ចុប្បន្ននេះ ស.ស.យ.ក. គឺជាអង្គការយុវជនដ៏ធំមួយក្នុងចំណោមស្ថាប័នយុវជនដ​ទៃ​​ទៀត ដែលមានរចនាសម្ព័ន្ធចាត់តាំងនៅទូទាំងរាជធានី-ខេត្ត ទាំង២៥ និងមានតំណាងក្រុមការងារនៅតាមក្រសួង-ស្ថាប័នរដ្ឋនានាផងដែរ។ ក្នុងរយៈពេល ៧ឆ្នាំកន្លងទៅនេះ ស.​​ស.យ.ក. បានចូលរួមចំណែកយ៉ាងផុសផុលក្នុងសកម្មភាពសេដ្ឋកិច្ច-សង្គម ចាប់ពីកម្រិតមូលដ្ឋានរហូ​ត​ដល់ថ្នាក់ជាតិ ដោយផ្តោតការយកចិត្តទុកដាក់សំខាន់លើការបង្កើតជាវេទិកាផ្សេងៗសម្រាប់ផ្សារភ្ជាប់យុវជនដែលមានចិត្តគំនិត ឆន្ទៈ និងបេះដូងក្នុងការចូលរួម និងតប​ស្នង​ត្រលប់ទៅសង្គមជាតិរបស់យើងវិញ។

ជាឧទាហរណ៍ ក្នុងចំណោមសកម្មភាពដែលយើងបានធ្វើនាពេលកន្លងមក រួមមាន៖

ក្នុងឆ្នាំ២០១៦ ស.ស.យ.ក. បានរៀបចំពិធីថ្វាយព្រះពរសង្រ្កាន្តឆ្នាំថ្មី ដើម្បីសម្ដែងថ្វាយនូវកតញ្ញូកតវេទិតាធ​ម៌ ចំពោះព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។ ឆ្លៀតក្នុងឱកាសដ៏វិសេសវិសាលនេះ ជំនួសមុខឱ្យក្រុមគ្រួសារសហភាពសហព័ន្ធយុវជនកម្ពុជា     ទូល​ព្រះ​បង្គំជាខ្ញុំសូមចូលរួមអបអរសាទរពិធីបុណ្យខួបលើកទី១៥ នៃការគ្រងព្រះបរមរាជសម្បត្តិរបស់ ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី  ព្រះមហាក្សត្រនៃព្រះរាជាណាច​ក្រ​កម្ពុជា និងសូមលំឱនកាយវាចាចិត្ត ក្រាបបង្គំសម្ដែងថ្វាយនូវព្រះសព្ទសាធុការពរជ័យ បវរសួស្ដី សិរីវឌ្ឍនា វិបុលសុខ មហាប្រសើរគ្រប់យ៉ាង ចំពោះ ព្រះករុណា​ជាអម្ចាស់ជីវិតលើត្បូង និងសម្តេចយាយ ជាទីគោរពសក្ការៈដ៏ខ្ពង់ខ្ពស់បំផុត និងសូមព្រះអង្គទ្រង់ប្រកបដោយព្រះរាជសុខភាពល្អបរិបូរណ៍ ព្រះ​កា​យ​ពលរឹងមាំ ព្រះបញ្ញាញាណភ្លឺថ្លាត្រចះត្រចង់ ព្រះជន្មាយុយឺនយូរ ចាកផុតនូវព្រះរោគាព្យាធិនានា ដើម្បីព្រះអង្គទ្រង់គង់នៅក្នុងព្រះបរមសិរីរាជសម្បត្តិបន្តព្រះរាជកិច្ចដ៏ឧត្តុងឧត្តមថ្លៃថ្លា ដឹកនាំនាវាកម្ពុជាទៅកាន់ជ្រោយវឌ្ឍនភាព និងសុភមង្គលព្រមទាំងគង់ប្រថាប់ជាម្លប់ដ៏ត្រជាក់ត្រជុំដល់ប្រជាពលរដ្ឋខ្មែរគ្រប់រូប ជាអង្វែងតរៀងទៅ។

ក្រៅពីនេះ សកម្មភាពស.ស.យ.ក. ក៏បានរួមបញ្ចូលនូវសកម្មភាពលើកកម្ពស់ការយល់ដឹងទៅលើបញ្ហាសង្គមជាច្រើនទៀត ដែលក្នុងនោះរួមមាន ការលើកកម្ពស់ការយល់ដឹងពីជំងឺមហារីកលើកុមារ ហានិភ័យនៃជំងឺមហារីកមាត់ស្បូន សុវត្ថិភាពចរាចរណ៍ផ្លូវគោកការស្ម័គ្រចិត្តផ្តល់ឈាម ការយល់​ដឹង​ផ្នែកបរិស្ថាន អនាម័យ និងយុទ្ធនាការដាំដើមឈើជាដើម។ ព្រឹត្តិការណ៍អង្គរសង្រ្កាន្ត និងសង្រ្កាន្តតាមបណ្តារាជធានី-ខេត្ត ក៏បានរួមចំណែកយ៉ាងធំធេងផងដែរ ក្នុងការលើកកម្ពស់ការយល់ដឹងទៅលើការការពារ និងថែរក្សាសម្បត្តិបេតិកភណ្ឌវប្បធម៌អរូបី ក្នុងបរិបទនៃសាកលភាវូបនីយ​កម្ម។

ចំពោះវិស័យអប់រំ និងកីឡា ដោយមានការគាំទ្រយ៉ាងពេញទំហឹងពីសំណាក់រាជរដ្ឋាភិបា​​​​ល វិស័យឯកជន និងភាគីពាក់ព័ន្ធនានា ស.ស.យ.ក. បានមានលទ្ធភាពចូលរួមចំណែកតាមរយៈកម្មវិធីអាហារូបករណ៍ទាំងក្នុង និងក្រៅប្រទេស ក៏ដូចជាការរៀបចំវគ្គបំប៉នថ្នាក់ទី១២ សម្រាប់សិស្សដែលត្រៀមប្រឡងបាក់ឌុបផងដែរ។ ការប្រកួតបាល់ទាត់ដណ្តើមពានរង្វាន់Soccer League និងការប្រកួតបាល់ទាត់មិត្តភាពយុវជនអន្តរក្រសួង-ស្ថាប័ន គឺជាយន្តការមួយទៀតសម្រាប់មហាជន និងមន្ត្រីរាជការនៅតាមក្រសួង-ស្ថាប័នរដ្ឋ ដើម្បីជួប និងប្រា​ស្រ័​យ​ទាក់ទងគ្នាតាមរយៈការប្រកួតកីឡាបាល់ទាត់ជាលក្ខណៈមិត្តភាព។

នៅថ្នាក់មូលដ្ឋានវិញ សមាជិក សមាជិកា ស.ស.យ.ក. ក្រៅពីបានចូលរួមសកម្មភាពជាច្រើនដូចជាការឧបត្ថម្ភដល់ប្រជាពលរដ្ឋក្រីក្រនៅតាមមូលដ្ឋាន ការឧប​ត្ថម្ភ​ជា​សម្ភារៈដល់ចាស់ជរាក្រីក្រ ការជួសជុល ឬសាងសង់ផ្ទះជូនប្រជាពលរដ្ឋ សមាជិក សមាជិកាយើង ក៏បានចូលរួមចំណែកជាមួយអាជ្ញាធរមូលដ្ឋានទាំងមុន អំឡុង និងក្រោយពេលគ្រោះមហន្តរាយនានាផងដែរ។ សកម្មភាព​​នៅតាមសហគមន៍ដ៏សំខាន់មួយទៀត គឺបេសកកម្មរបស់ក្រុម    គ្រូពេទ្យស្ម័គ្រចិត្ត ដែលតែងតែលះបង់ថវិកា កម្លាំងកាយ ចិត្ត បញ្ញា ស្មារតី ជាពិសេសពេលវេលាផ្ទាល់ខ្លួនពីការងារវិជ្ជាជីវៈប្រចាំថ្ងៃរបស់ខ្លួន ដោយមិនខ្លាចនឿយហត់ ដើម្បីធ្វើដំណើរទៅតាមមូលដ្ឋាន និងផ្តល់នូវសេវាពិនិត្យសុខភាពឥតគិតថ្លៃដោយផ្ទាល់ជូនប្រជាពលរដ្ឋនៅ ទូទាំងប្រទេស។

ក្នុងរយៈពេល៧ឆ្នាំនេះផងដែរ តាមរយៈសកម្មភាពរបស់យើង យើងមិនត្រឹមតែបានបង្កើត និងរក្សាទំនាក់ទំនងជាមួយយុវជនដែលមានឆន្ទៈរួមនៅក្នុងប្រទេសប៉ុណ្ណោះទេ តែ  ស.ស.យ.ក. ក៏បានបង្កើតចំណងទំនាក់ទំនងជាមួយនឹងអង្គការយុវជននានា មិនថានៅថ្នាក់ជាតិ ឬអន្តរជាតិនោះទេ។​ យើងបានពង្រឹង និងពង្រីកចំណងទំនាក់ទំនងជាមួយនឹងក្រុមប្រឹក្សាជាតិយុវជន និងអង្គការយុវជនជាច្រើនទាំងក្នុងតំបន់ និងនៅលើពិភពលោក។

ស.ស.យ.ក. នឹងបន្តពង្រឹង និងពង្រីកទំនាក់ទំនងល្អ ដែលយើងមានរវាងអង្គការចាត់តាំងយុវជន មិនត្រឹមសម្រាប់ថ្ងៃនេះ តែសម្រាប់ថ្ងៃអនាគតផងដែរ។

ក្នុងរយៈពេលដូចគ្នានេះ យើងក៏បានសម្រេចនូវសមិទ្ធផលគួរជាទីមោទនៈសម្រា​ប់​ជាតិនោះគឺ ការបំបែកឯតទគ្គកម្មពិភពលោក (Guinness World Records)ចំនួន៤ ដែលរួមមាន៖ នំអន្សមយក្សដែលមានទម្ងន់ ៤០៤០ គីឡូក្រាម, ការរាំម៉ាឌីហ្សុនដែលមានអ្នកចូលរួមច្រើនជាងគេលើពិភពលោក (២០១៥ នាក់), ក្រមាវែងជាងគេនៅលើពិភពលោក ដែលមានប្រវែង ១១៤៩,៨ ម៉ែត្រ, និងទូក ង វែងជាងគេនៅលើពិភពលោក ដែលមានប្រវែង ៨៧,៣ ម៉ែត្រ។ ឯតទគ្គកម្មពិភពលោកទាំង៤នេះ បានបញ្ជាក់ច្បាស់ឲ្យយើងដឹងថា បើសិនជាយើងមានគំនិត គួបផ្សំនឹងការខិតខំប្រឹងប្រែង ការយកចិត្តទុកដាក់ និងការតាំងចិត្តរួមគ្នា នោះយើងនឹងអាចសម្រេចអ្វីៗបានទាំងអស់។

ជារួម សកម្មភាពទាំងឡាយរបស់យើង ដែលរាប់តាំងពីព្រឹត្តិការណ៍ធំៗនានា រហូតដល់សកម្មភាពរបស់សមាជិកនៃក្រុមគ្រួសារ ស.ស.យ.ក. ម្នាក់ៗ នៅទូទាំងប្រទេស សុទ្ធតែមានសារៈសំខាន់ដូចគ្នា និងមិនអាចកាត់ថ្លៃបាន។ យើងសង្ឃឹមយ៉ាងមុតមាំថា ការលះ​​បង់ការតាំងចិត្ត និងឆន្ទៈ ចំពោះសកម្មភាពស្ម័គ្រចិត្តរបស់យើង មិនត្រឹមតែជះឥទ្ធិព​ល​វិជ្ជមានចំពោះសង្គមជាតិរបស់យើងប៉ុណ្ណោះទេ តែថែមទាំងបានផ្តល់ភាពជាគំរូសម្រាប់យុវជ​នដទៃទៀតផងដែរ។ មិនតែប៉ុណ្ណោះ មិនថាសកម្មភាពក្នុងវិស័យណានោះទេ យើងតែងតែប្រកាន់ខ្ជាប់ជានិច្ចនូវស្មារតីនៃការយកចិត្តទុកដាក់ខ្ពស់ និងជំរុញទឹកចិត្តខ្លួនឯង ឲ្យក្លាយជាចំណែកនៃដំណោះស្រាយវិជ្ជមាន ជាជាងធ្វើជាបន្ទុក ឬអំរែករបស់សង្គមជាតិ។ ប្រាកដណាស់ សកម្មភាពទាំងអស់នេះក៏ជាការអប់រំនូវផ្នត់គំនិតយុវជនឲ្យចេះលះបង់ហើយចូលរួមចំណែកដើម្បីសម្រេចប្រយោជន៍រួមផងដែរ ដែលយើងសង្ឃឹមយ៉ាងមុតមាំថា សមាជិក សមាជិកា ស.ស.យ.ក. គ្រប់រូបចាំទុកនូវស្មារតី២ធ្នូនេះជារៀងរហូត និងឈរលើមូលដ្ឋាននេះ ដើម្បីធ្វើការសម្រេចចិត្តនានាសម្រាប់សង្គមជាតិតទៅអនាគត មិនថាទាំងក្នុងជីវិតផ្ទាល់ខ្លួន និងជីវិតការងារ។

“ខ្ញុំពិតជាមានមោទនភាពក្នុងនាម​ជាសមាជិកម្នា​ក់​​នៃក្រុមគ្រួសារស.ស.យ.ក.របស់យើង”។

ក្រោមស្មារតីនេះ ក្នុងនាមថ្នាក់ដឹកនាំសហភាពសហព័ន្ធយុវជនកម្ពុជា ខ្ញុំសូមឆ្លៀតឱកាសនេះថ្លែងអំណរគុណយ៉ាងជ្រាលជ្រៅបំផុត ចំពោះសមាជិក សមាជិកាគ្រប់រូប ដែលបានខិតខំប្រឹងប្រែងបំពេញការងារនាពេលកន្លងមក។ អ្នកទាំងអស់គ្នា គឺជាអ្នកដែលធ្វើឱ្យ ស.ស.យ.ក. បានរីកលូតលាស់ និងការទទួលស្គាល់ពីសង្គមជាបន្តបន្ទាប់មកដល់ពេលបច្ចុប្ប​ន្ន ហើយខ្ញុំរីករាយនឹងនិយាយថា “ខ្ញុំពិតជាមានមោទនភាពក្នុងនាម​ជាសមាជិកម្នា​ក់​​នៃក្រុមគ្រួសារស.ស.យ.ក.របស់យើង”។ ខ្ញុំក៏សូមឆ្លៀតក្នុងឱកាសនេះផងដែរក្នុងកា​រ​ថ្លែងអំណរគុណដ៏ស្មោះស្ម័គ្រជូនចំពោះអាណាព្យា​​បាលទាំងអស់ដែលជឿជាក់ ផ្តល់ទំនុកចិត្ត និងការគាំទ្រ ដោយបានអនុញ្ញាតឲ្យកូនៗរបស់អ៊ុំ ពូ មីង ចូលរួមធ្វើជាយុវជនស្ម័គ្រចិត្ត និងជាចំណែកមួយនៃក្រុមគ្រួសារ ស.ស.យ.ក.។

ខណៈពេលដែលយើងកំពុងអបអរសាទរ នូវកិច្ចខិតខំប្រឹងប្រែង និងសមិទ្ធផលរបស់  ស.ស.យ.ក. នាពេលកន្លងមកនេះ យើងក៏បានដឹង និងទទួលស្គាល់ផងដែរថាមានអង្គការ សមាគម និងក្រុមយុវជន ដែលមានបេសកកម្ម និងបុព្វហេតុប្រហាក់ប្រហែលទៅនឹង ស.ស.យ.ក. ដែលបាន និងកំពុងរួមចំណែកយ៉ាងសំខាន់ក្នុងការជះឥទ្ធិពលជាវិជ្ជមានចំពោះសង្គមជាតិរបស់យើង។ ស.ស.យ.ក. សូមវាយតម្លៃខ្ពស់ចំពោះកិច្ចខិតខំប្រឹងប្រែង របស់    ស្ថាប័នទាំងអស់ ហើយយើងក៏សូមស្វាគមន៍ និងត្រៀមខ្លួនក្នុងការសហការគ្នាដើម្បី
ផលប្រយោជន៍ និងបេសកកម្មរួមក្នុងបុព្វហេតុជាតិមាតុភូមិរបស់យើងទាំងអស់គ្នា។

ទោះយើងមកពីស្ថាប័នផ្សេងៗគ្នា មានអត្តសញ្ញាណផ្សេងៗគ្នា មានសាវតារ និងក្តីស្រមៃរៀងៗខ្លួន យ៉ាងណាក្តី ក៏ខ្ញុំនៅតែមានជំនឿថា យើងមានគំនិតរួម និងយល់ស្របជាមួយគ្នាថាអ្វីដែលយើង បាន និងកំពុងធ្វើទាំងអស់នោះ ពិតជាបានក្លាយជាប្រយោជន៍រួមសម្រាប់សង្គមនៅថ្ងៃនេះ និងទៅថ្ងៃអនាគត ហើយក៏បានបង្ហាញយ៉ាងច្បាស់ពីឆន្ទៈ និងការគិតគូររបស់យើងក្នុងភាពជាពលរដ្ឋដែលមានទំនួលខុសត្រូវរបស់ពួកយើងចំពោះប្រទេសជាតិ។

អង្គពិធីទាំងមូលជាទីមេត្រី!

ថ្ងៃនេះ បើទោះជាយើងបានយកឱកាសនេះដើម្បីរំលឹកឡើងវិញនូវគុណូបការៈរបស់បុព្វបុរសយើង ក៏ដូចជាអបអរសាទរនូវរាល់សមិទ្ធផលដែលយើងសម្រេចបាន ប៉ុន្តែយើងក៏គួរតែសម្លឹងមើលទៅមុខទៀត ហើយត្រូវត្រៀមខ្លួនដើម្បីបន្តចូលរួមចំណែកសម្រាប់អនាគតរបស់ប្រទេសជាតិយើង។ ទោះយើងធ្វើក្នុងនាម ស.ស.យ.ក. ឬក្នុងនាមខ្លួនឯងផ្ទាល់ក៏ដោយ តែរាល់ការសម្រេចចិត្ត និងការចូលរួមរបស់យើងនៅថ្ងៃនេះ នឹងក្លាយជាផ្នែកមួយដ៏សំខាន់ក្នុងការត្រួសត្រាយផ្លូវដ៏ត្រឹមត្រូវមួយសម្រាប់អនាគតកម្ពុជា។

ពិតណាស់ថា យើងមិនអាចទាយទុកជាមុននូវអ្វីដែលនឹងកើតឡើងចំពោះយើងក៏ដូចជាសង្គមជាតិយើងនាពេលអនាគត ប៉ុន្តែខ្ញុំមានជំនឿយ៉ាងមុតមាំថាក្នុងអំឡុងពេលតែមួយនៃការរួមចំណែករបស់យើងក្នុងដំណើរឆ្ពោះទៅមុខ សមាជិក សមាជិកា ទាំងអស់ត្រូវចងចាំនូវប្រសាសន៍ដ៏ថ្លៃថ្លារបស់ប្រធានទី១ របស់ស្ថាប័នយើង គឺសម្តេចអគ្គមហាសេនាបតីតេជោ ហ៊ុន សែន ដែលលោកបានថ្លែងក្នុងពិធីបិទមហាសន្និបាតលើកទី៤របស់ ស.ស.យ.ក. កាលពីថ្ងៃទី២៧ ខែវិច្ឆិកា ឆ្នាំ២០១៨ កន្លងទៅ ថា “យុវជនគួរចូលរួមចំណែកក្នុងការថែរក្សា ការពារ សន្តិភាព និងស្ថិរភាពជាតិ ក៏ដូចជាចូលរួមចំណែកក្នុងកិច្ចអភិវឌ្ឍន៍សេដ្ឋកិច្ចសង្គម ឆ្ពោះទៅរកការសម្រេចបាននូវទស្សនៈវិស័យ ២០៥០”។

ក្នុងស្មារតីនេះ យើងត្រូវត្រៀមខ្លួន និងប្តេជ្ញា ថា៖

១.  ការពារនូវអធិបតេយ្យជាតិ បូរណភាពទឹកដី និងការពារឲ្យបានដាច់ខាតនូវភាពសុខដុមរមនារបស់សង្គម

២. ចូលរួមឲ្យអស់ពីសមត្ថភាពក្នុងការអភិវឌ្ឍសេដ្ឋកិច្ចជាតិរបស់យើង

៣. បន្តរួមចំណែកជាវិជ្ជមានតាមរយៈសកម្មភាពស្ម័គ្រចិត្តរបស់យើងទាំងអស់គ្នា

ប្រវត្តិសាស្រ្តជាច្រើនរយឆ្នាំរបស់កម្ពុជា ជាពិសេសក្នុងរយៈពេល១០០ឆ្នាំចុងក្រោយនេះ បានបង្រៀនយើងថា ការប្រែប្រួលឥតឈប់ឈរនៃភូមិសាស្រ្តនយោបាយមានសារៈសំខាន់ណាស់​ដែលតម្រូវឲ្យយើងត្រូវចេះតាមដាន និងយកចិត្តទុកដាក់ខ្ពស់។ ក្នុងចន្លោះពេល នៃសម័យអាណានិគមនិយម និងសម័យសង្គ្រាមត្រជាក់ ប្រទេសកម្ពុជាបានទទួលនូវមេរៀនដ៏ជូរចត់ជាច្រើន និងបានឆ្លងកាត់ភាពលំបាកលំបិន និងភាពច្រំដែលនៃអស្ថិរភាព ក្តីវិនាសអន្តរាយ និងការរងទុក្ខវេទនា ដ៏ច្រើនឥតគណនា។ ផ្អែកលើបរិបទនេះហើយដែលប្រជាជនកម្ពុជាទាំងអស់បានយល់យ៉ាងច្បាស់ពីតម្លៃមិនអាចខ្វះបាននៃសុខសន្តិភាព និងស្ថិរភាពទោះស្ថិតក្នុងកាលៈទេសៈណាក៏ដោយ។ បច្ចុប្បន្នកម្ពុជាកំពុងតែសប្បាយរីករាយជាមួយនឹងសន្តិភាពពេញលេញ និងស្ថិរភាពដ៏រឹងមាំ ដែលអនុញ្ញាតឲ្យយើងអាចរក្សាបានទំនាក់ទំនងលើឆាកអន្តរជាតិនៅគ្រប់កម្រិតទាំងអស់ដោយឈរលើមូលដ្ឋាននៃការគោរពគ្នាទៅវិញទៅមកការយល់ពីគ្នា និងកិច្ចសហប្រតិបត្តិការដើម្បីប្រយោជន៍រួមសម្រាប់ជាតិ និងប្រជាជនរបស់យើងទាំងអស់គ្នា។

ក្នុងន័យនេះផងដែរ ភាពសុខដុមរមនានៃសង្គមក៏រឹងរឹតតែមានសារៈសំខាន់។ មេរៀនកាលពីអតីតកាល ក្នុងនោះរាប់តាំងពីព្រឹត្តិការណ៍ដែលឈានទៅដល់ការធ្វើរដ្ឋប្រហារនា ឆ្នាំ១៩៧០ ទម្លាក់សម្តេចព្រះនរោត្តម សីហនុ រហូតដល់មេរៀនថ្មីៗដែលបានកើតឡើងមុន និងក្រោយពេលបោះឆ្នោតសាកល ក្នុងឆ្នាំ២០១៣ បានបង្រៀនយើងឲ្យស្គាល់ថានយោបាយដែលគ្មានភាពទទួលខុសត្រូវ សកម្មភាពគ្រប់រូបភាពដែលផ្ទុយពីច្បាប់ ការប្រមាថព្រះមហាក្ស​​ត្រ ការបញ្ឆេះឲ្យមានការស្អប់ខ្ពើមជាតិសាសន៍ ការទាមទារដែលគ្មានទំនួលខុសត្រូវ ដែលធ្វើឲ្យប៉ះពាល់យ៉ាងធ្ងន់ធ្ងរដល់សន្តិសុខ និងផលប្រយោជន៍ជាតិ អាចនឹងធ្វើឱ្យមានការគំរាមកំហែងរយៈពេលវែងចំពោះ សន្តិភាព ស្ថិរភាព និងភាពសុខដុមរមនានៃសង្គម ដែលជាមូលដ្ឋានគ្រឹះ និងជាបុរេលក្ខខណ្ឌក្នុងការធានាឲ្យបានការអភិវឌ្ឍប្រកបដោយចីរភាព និងភាពរុងរឿងរបស់ប្រទេស។ ក្នុងន័យនេះ ស.ស.យ.ក. សូមបញ្ជាក់នូវការប្តេជ្ញាចិត្ត និងជំហររឹងមាំឥតងាករេ ថាយើងនឹងបន្តខិតខំប្រឹងប្រែងទោះក្នុងតម្លៃណាក៏ដោយ ការពារឲ្យបាននូវឯករាជភាព បូរណភាពទឹកដី និងការពារនូវសុខដុមរមនានៃសង្គមសម្រាប់ប្រជាជនយើង និងប្រឆាំងដាច់ខាតនូវរាល់ការគំរាមកំហែងគ្រប់រូបភាពទាំងអស់ទាំងក្នុង និងក្រៅប្រទេស។

ក្នុងទិដ្ឋភាពសេដ្ឋកិច្ច កម្ពុជាបានដាក់ចេញនូវគោលដៅ និងទិសដៅច្បាស់លាស់ ដើម្បីប្រែក្លាយខ្លួនទៅជាប្រទេសដែលមានចំណូលមធ្យមកម្រិតខ្ពស់ត្រឹម ឆ្នាំ២០៣០ និងទៅជាប្រទេសអភិវឌ្ឍន៍ត្រឹមឆ្នាំ២០៥០។ ដើម្បីសម្រេចបាននូវគោលដៅនេះ រាជរដ្ឋាភិបាលកម្ពុជាបានដាក់ចេញនូវផែនការយុទ្ធសាស្រ្ត គោលនយោបាយជាតិ និងផែនការសកម្មភាព ចំពោះ  វិស័យអាទិភាពពាក់ព័ន្ធនានាដែលជាផែនទីចង្អុលផ្លូវក្នុងការធានានូវសង្គតិភាព និងនិរន្តរភា​ពនៃដំណើរឆ្ពោះទៅសម្រេចបានគោលដៅ និងសមិទ្ធផលទាំងនេះ។

ក្នុងន័យនេះ នៅរៀងរាល់អាណត្តិនីមួយៗ រាជរដ្ឋាភិបាលកម្ពុជាបានដាក់ចេញនូវយុទ្ធសាស្រ្តចតុកោណ ផែនការយុទ្ធសាស្រ្តអភិវឌ្ឍន៍ជាតិ យុទ្ធសាស្រ្តអភិវឌ្ឍន៍តាមវិស័យ ដោយបានរួមបញ្ចូលផងដែរនូវយន្តការគ្របដណ្តប់គ្រប់ជ្រុងជ្រោយសម្រាប់កម្មវិធីកំណែទម្រ​ង់​រដ្ឋជាបន្តបន្ទាប់ ដើម្បី​ឆ្លើយតបទៅនឹងឆន្ទៈ និងបំណងប្រាថ្នារបស់ប្រជាជន ក៏ដូចជាត្រៀមខ្លួនសម្របទៅនឹងការប្រែប្រួលយ៉ាងឆាប់រហ័សនៅក្នុងតំបន់ និងពិភពលោក។ ដោយមានយន្តការ និងការអនុវត្តច្បាស់លាស់ យើងមើលឃើញថារាជរដ្ឋាភិបាលកម្ពុជាបានខិតខំពង្រឹង និងពង្រីកសក្តានុពលជាតិ ដើម្បីធានាឲ្យបានកំណើនសេដ្ឋកិច្ចដ៏រឹងមាំមួយ ឆ្ពោះទៅការសម្រេចបានគោលដៅឆ្នាំ២០៣០តាមរយៈការធ្វើពិពិធកម្មសេដ្ឋកិច្ច ការធ្វើឲ្យមានប្រសិទ្ធភា​ព​ក្នុងការចំណាយ ការវិនិយោគសាធារណៈ និងការធ្វើឲ្យប្រសើរឡើងនូវវិស័យហិរញ្ញវត្ថុ     សាធារណៈ​ ជាពិសេសចំពោះវិស័យដែលផ្តល់ប្រាក់ចំណូលដល់ថវិកាជាតិ។

នៅក្នុងដំណើរឆ្ពោះទៅកាន់គោលដៅនេះ យើងរំពឹងថានឹងអាចប្រែក្លាយប្រទេសកម្ពុជាដែលធ្លាប់តែពឹងផ្អែកលើវិស័យកសិកម្មជាស្នូលសេដ្ឋកិច្ច ទៅជាប្រទេសនាំចេញផ្នែក កសិ-ឧស្សាហកម្ម និងឧស្សាហកម្មធុនមធ្យម ដោយរាប់បញ្ចូលនូវការចាប់យកបច្ចេកវិទ្យាថ្មីៗ ដូចបានដាក់ចេញក្នុង“ផែនការយុទ្ធសាស្រ្តអភិវឌ្ឍន៍ឧស្សាហកម្ម២០១៥-២០២៥” ក្នុងពេលតែមួយជាមួយនឹងការធ្វើពិពិធកម្មទីផ្សារ និងស្វែងរកទីផ្សារនាំចេញថ្មី ។ ទោះ​បី​​យ៉ាងណាក៏ដោយ កិច្ចខិតខំប្រឹងប្រែងនេះពឹងផ្អែកសំខាន់លើការអភិវឌ្ឍធនធានមនុស្ស ដែ​ល​ជាមូលដ្ឋានខ្វះមិនបានក្នុងបរិបទសេដ្ឋកិច្ច-សង្គម និងនយោបាយកម្ពុជានាពេលបច្ចុប្បន្ន ក៏ដូចជាក្នុងរយៈពេល៣ទសវត្សរ៍ទៅមុខទៀត។ ដូច្នេះវាពិតជាមានសារៈសំខាន់ដែលយើងត្រូវអភិវឌ្ឍសមត្ថ​​ភា​ព​ជាបន្តបន្ទាប់ បង្កើនជំនាញវិជ្ជាជីវៈ និងបង្កើនផលិតភាពរបស់ធនធានមនុស្សវ័យក្មេង និងមានសក្កានុពលរបស់ប្រទេស ព្រោះថាពួកគេនឹងក្លាយជាកត្តាកំណត់សម្រាប់កំណើនសេដ្ឋកិច្ច។

ចំពោះទិដ្ឋភាពសង្គម ស.ស.យ.ក. សូមបញ្ជាក់យ៉ាងមុតមាំនូវឆន្ទៈរបស់យើងក្នុងការថែរក្សា និងបន្តស្មារតី ២ ធ្នូ ដែលបានចាប់ផ្តើមកាលពី៤១ឆ្នាំមុន។ យើងនឹងព្យាយាមឲ្យអស់លទ្ធភាពក្នុងការបន្តផ្តល់វេទិកានានា ដែលជាឱកាសសម្រាប់យុវជនក្នុងការចូលរួមចំណែកដើម្បីសង្គមជាតិ។ ដូចអ្វីដែលយើងបានប្រឹងប្រែងធ្វើក្នុងរយៈពេល៧ឆ្នាំកន្លងមកនេះ យើងសង្ឃឹមថា វាមិនត្រឹមតែបានផ្តល់ផលវិជ្ជមានប៉ុណ្ណោះទេ ប៉ុន្តែវាថែមទាំងបានផ្តល់ភាពជាគំរូក្នុងការជំរុញយុវជនផ្សេងទៀតឲ្យចេះយកចិត្តទុកដាក់ ចេះខ្វាយខ្វល់ ជាមួយស្មារតីសុទិដ្ឋិនិយម ក្តីសង្ឃឹម ចំពោះសង្គមជាតិ ហើយប្រែក្លាយខ្លួនឲ្យទៅជាអ្នកដឹកនាំ ដែលមានទំនួលខុសត្រូវមួយ មិនថាក្នុងដំណាក់កាលនេះ ឬទៅថ្ងៃអនាគតនោះទេ។ ទោះជាយើងមានក្តីស្រមៃផ្សេងគ្នា ប៉ុន្តែយើងសុទ្ធតែមានឆន្ទៈដូចគ្នាក្នុងការរួមចំណែកថែរក្សា និងកសាងសង្គមកម្ពុជាដ៏រឹងមាំមួយ ដែលមានប្រជាជនពោរពេញដោយសមត្ថភាព និងប្រកបដោយធម៌ ហើយគ្រប់កាលៈទេសៈទាំងអស់ យើងតែងមានមោទនភាពចំពោះអត្តសញ្ញាណ និងប្រវត្តិសាស្រ្ត​របស់ខ្លួន។

ស.ស.យ.ក. ជឿជាក់លើព្រះរាជាណាចក្រកម្ពុជា ហើយក្នុងនាមជាយុវជនខ្មែរ យើងបានយល់យ៉ាងច្បាស់ពីពលិកម្មដែលមិនអាចកាត់ថ្លៃបានទាំងឡាយ ដែលបាននាំឲ្យកម្ពុជាបានមកដល់ថ្ងៃនេះ។ លើសពីនេះទៅទៀត យើងក៏យល់ផងដែរថា ភាពរីកចម្រើនដែលយើងមានសព្វថ្ងៃនេះ មិនមែនកើតចេញពីសំណាង ឬភាពចៃដន្យនោះទេ តែវាបានកើតចេញពីផែនការ និងការអនុវត្តច្បាស់លាស់។ យើងទទួលបានសមិទ្ធផលដ៏អស្ចារ្យក្នុងរយៈពេល៤១ឆ្នាំ កន្លងមកនេះ ដែលយើងត្រូវទទួលស្គាល់ ប៉ុន្តែយើងក៏មិនអាចស្កប់ស្កល់ត្រឹមនេះដែរ ព្រោះថា យើងនៅមានកិច្ចការ និងបញ្ហាជាច្រើនទៅមុខទៀតដែលត្រូវបំពេញ និងដោះស្រាយបន្តទៅមុខ។

មិត្តភក្តិបរទេសទាំងអស់ជាទីមេត្រី អ្នកទាំងអស់គ្នាពិតជាបានយល់ច្បាស់ពីការហែលឆ្លងកាត់របស់កម្ពុជា និងដឹងថាតើកម្ពុជាបានខិតខំពុះពារឆ្លងកាត់ឧបសគ្គជាច្រើនយ៉ាងណាទម្រាំបានមកដល់សព្វថ្ងៃ។ បើទោះបីជាយើងមិនរស់នៅក្នុងអតីតកាលក្តី តែសោកនាដកម្មដែលយើងបានឆ្លងកាត់ គឺជាបណ្តាសាផង និងជាពរជ័យផង ដែលធ្វើឲ្យយើងរឹងមាំ និងមានភាពច្បាស់លាស់ដែលបាននាំយើងមកដល់ថ្ងៃនេះ។ សូមអ្នកទាំងអស់គ្នាជឿជាក់ថា កម្ពុជាចង់បានតែមិត្តភក្តិប៉ុណ្ណោះដើម្បីបន្តពង្រឹង និងពង្រីកកិច្ចសហប្រតិបត្តិការលើគ្រប់វិស័យដើម្បីប្រយោជន៍រួមទាំងអស់គ្នា។ នេះគឺជាជំហរ របស់យើង។ យើងមានជំនឿយ៉ាងមុតមាំលើរបបរាជានិយមអាស្រ័យរដ្ឋធម្មនុញ្ញ គាំទ្រលទ្ធិប្រជាធិបតេយ្យសេរីពហុបក្ស និងគោលការណ៍នៃសង្គមនីតិរដ្ឋ ដូចមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា។ ទន្ទឹមនឹងនេះ យើងក៏មានជំនឿយ៉ាងមុតមាំផងដែរថាសន្តិភាព និងស្ថិរភាពគឺជាបុរេលក្ខខណ្ឌចាំបាច់ក្នុងការធានានូវសេចក្តីសុខ សុភមង្គលរបស់ប្រជាជនយើង ហើយសន្តិភាព និងស្ថិរភាព នេះក៏ជាមូលដ្ឋានគ្រឹះនៃកំណើនសេដ្ឋកិ​ច្ច និងភាពរុងរឿងរបស់កម្ពុជាយើងផងដែរ។ កម្ពុជាដែលមានសុខសន្តិភាព និងភាពរីកចម្រើន គឺជាគោលដៅដែលយើងចង់បានទាំងអស់គ្នា។

មេរៀនទាំងឡាយដែលបានធ្វើឲ្យយើងមានមោទនភាពផង ឬមានការសោកស្តាយផងនោះនឹងស្ថិតនៅជាមួយយើងទាំងអស់គ្នា។ យើងជាប្រជាជនខ្មែរត្រូវសម្រេចចិត្តលើជោគ​វាស​នា​ប្រទេសជាតិរបស់យើង ហើយយើងត្រូវតែផ្តោតការយកចិត្តទុកដាក់ខ្ពស់ចំពោះគោលដៅរប​ស់​យើង។ យើងបានធ្វើដំណើរមកឆ្ងាយហើយ  ហើយយើងក៏សម្រេចបាននូវសមិទ្ធផលជាច្រើនសម្រាប់ជាតិមាតុភូមិយើង។ ប៉ុន្តែចូរកុំភ្លេចថា  នៅមានការងារជាច្រើនទៀតដែលយើងត្រូវធ្វើ  ដែលក្នុងន័យនេះ  យើងត្រូវរំលឹកខ្លួនឯងជាប់ជានិច្ចថា  សង្គមអនាគតនឹងអាចប្រែប្រួលទាំ​ង​លើទិដ្ឋភាពឱកាស  និងបញ្ហាប្រឈម  ដែលទាមទារឲ្យយើងមិនត្រឹមតែត្រៀមខ្លួនដើម្បីទប់​ទ​ល់​ប៉ុន្តែថែមទាំងប្រើប្រាស់ឲ្យអស់សមត្ថភាព និងឆន្ទៈមនសិការ ដើម្បីកែប្រែបញ្ហាប្រឈមទាំងនោះ ទៅជាកាលានុវត្តភាពថ្មីសម្រាប់ការរីកចម្រើនរបស់ជាតិយើងបន្តទៅទៀត។

អនាគតរបស់សង្គមជាតិ និងសុភមង្គលរបស់ប្រជាជន គឺមានសារៈសំខាន់បំផុត ដែលមិនអាចបណ្តោយទៅតាមយថាហេតុ ឬឲ្យមានភាពចៃដន្យណាមួយកើតឡើងធ្វើឲ្យប៉ះពាល់នោះទេ។ ប្រាកដណាស់ពេលនេះ ពេលដែលកម្ពុជារីករាយនឹងសន្តិភាព ស្ថិរភាព តែវាក៏ជាពេលវេលាដ៏សំខាន់ដែលយុវជនកម្ពុជាត្រូវតែគិតបន្ថែមទៀតអំពីតួនាទី ទំនួលខុសត្រូវ និងការចូលរួមចំណែករបស់ខ្លួនដើម្បីសង្គមជាតិយើង។