កំណត់ត្រាពិភពលោកថ្មី ដែលជាទូកងវែងជាងគេលើពិភពលោកនឹងត្រូវបានគណៈកម្មការ Guinness World Records មកធ្វើការវាយតម្លៃនៅថ្ងៃស្អែក ថ្ងៃទី ១២ ខែវិច្ឆិកា ឆ្នាំ២០១៨ នៅតំបន់ទីប្រជុំជនអ្នកលឿងត្រើយខាងកើត ស្ថិតក្នុងឃុំព្រែកខ្សាយ ខ ស្រុកពាមរក៍ ខេត្តព្រៃវែង។
“កម្ពោជិកបុត្តាខេមរាតរី” មានន័យថាទូកង របស់កូនខ្មែរក្នុង ដែនកម្ពុជា ជាទូកង ដែល វែងជាងគេលើពិភពលោក កសាងឡើងដោយកូនខ្មែរជាង ១ម៉ឺន៤ពាន់នាក់ ដែលបានប្រើប្រាស់រយៈពេល ១៩២ថ្ងៃដើម្បីសាងសង់។ ទូកង ខ្មែរនេះមានប្រវែង ៨៧,៣ ម៉ែត្រនេះ ធ្វើឡើងដោយដើមគគីរចំនួន ៦ ដើម មានទទឹង១,៩៤ម៉ែត្រ ជម្រៅ០,៨០ម៉ែត្រ ដែលអាចផ្ទុកចំណុះទូកបាន១៧៩នាក់។ ទូកនេះផលិតឡើងតាមរចនាបទ និងបច្ចេកទេសរបស់កូនខ្មែរ ដែលក្បាលទូកលម្អដោយចម្លាក់ក្បាលរូបនាគ និងកន្សៃទូកផ្នែកខាងក្រោយលម្អដោយចម្លាក់ក្បាច់កន្ទុយហង្ស។
ការផលិតទូកង នេះមានគោលបំណងដើម្បីរំលឹកឡើងវិញនូវប្រវត្តិដ៏យូរលង់នៃការផលិត និងការប្រើប្រាស់ទូកង របស់ខ្មែរតាំងពីបុរាណ ក៏ដូចជារំលឹកដល់ស្នាព្រះហស្ថរបស់ព្រះមហាក្សត្រខ្មែរគ្រប់ជំនាន់ ជាពិសេសព្រះបាទជ័យវរ្ម័យទី៧ ដែលបានប្រើប្រាស់ទូកង ជាមធ្យោបាយក្នុងការធ្វើសឹកសង្គ្រាមជាមួយសត្រូវដើម្បីការពារបូរណភាពទឹកដី។ ជាមួយគ្នានេះទូកងនេះ ក៏មានគោលបំណងលើកតម្កើងកិត្យានុភាពជាតិតាមរយៈស្នាដៃដ៏អស្ចារ្យដែលផលិតដោយកូនខ្មែរ និងជម្រុញស្មារតីស្នេហាជាតិ និងសាមគ្គីភាពនៃយុវជនជាកូនចៅជំនាន់ក្រោយ ក្នុងការថែរក្សា និងអភិរក្សកេរតំណែលពីដូនតា។
ព្រឹត្តិការណ៍ប្រវត្តិសាស្ត្រនៃការបំបែកកំណត់ត្រានឹងមានកម្មវិធីជាច្រើនអមជាមួយគ្នាដែលមានដូចជា កម្មវិធីសម្តែងសិល្បៈ និងរបាំកម្សាន្ត ការអុំទូក ការពិនិត្យវាយតម្លៃ និងប្រកាសលទ្ធផល ពិធីប្រណាំងទូកងខេត្តព្រៃវែង រួមជាមួយការប្រគំតន្រ្តីកម្សាន្ត និងការបាញ់កាំជ្រួចសម្រាប់បងប្អូនប្រជាពលរដ្ឋចូលរួមជាសាក្សី ក៏ដូចជាអបអរសាទរទាំងអស់គ្នាជាមហាគ្រួសារខ្មែរផងដែរ។
