នាព្រឹកថ្ងៃទី០៩ ខែតុលា ឆ្នាំ២០១៥ ស.ស.យ.ក-តាកែវ បានរៀបចំការប្រឡងជ្រើសរើសជ័យលាភីអាហារូបករណ៍ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និង លោកជំទាវ ឆ្នាំ ២០១៥ នៅសាលសហសិក្សាមជ្ឈមណ្ឌលគរុកោសល្យភូមិភាគតាកែវ ដោយមានវត្តមានចូលរួមពីសំណាក់ ឯកឧត្តម សុខ ផេង រដ្ឋលេខាធិការក្រសួងសុខាភិបាល ឯកឧត្តម ស៊ូ ភិរិន្ទ រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមការងារសេនាធិការនៃក្រុមការងារថ្នាក់ជាតិចុះមូលដ្ឋានខេត្តតាកែវ ឯកឧត្តម សុខ សូកាន អ្នកតំណាងរាស្ត្រមណ្ឌលតាកែវ ឯកឧត្តម ស្រី បេន ប្រធានក្រុមប្រឹក្សាខេត្តតាកែវ និងឯកឧត្តម ឡាយ វណ្ណៈ អភិបាលនៃគណៈអភិបាលខេត្តតាកែវ។
នៅក្នុងឱកាសនោះ ឯកឧត្តម សុខ ផេង បានមានប្រសាសន៍សំណេះសំណាលជាមួយបេក្ខជនប្រឡង និងបានធ្វើការណែនាំ ផ្ដាំផ្ញើលើកទឹកចិត្ត ព្រមទាំងបានបើកនូវហិបវិញ្ញាសាដើម្បីដាក់ឱ្យដំណើរការនៃការប្រឡងនេះផងដែរ។
ការប្រឡងអាហារូបករណ៍នេះ មានបេក្ខជនចូលរួមប្រកួតប្រជែងសរុបចំនួន ៨៥១នាក់ ក្នុងនោះស្រីចំនួន ៣៨៧នាក់៕ អាហារូបករណ៍នេះមាន ៣៤០កន្លែង(បរិញ្ញាបត្រ២៩៥កន្លែង និងបរិញ្ញាបត្ររង៤៥កន្លែង)
